ثورة من الذات: مريت بالشوارع..شوارع القدس العتيقة
هنا سأكتب عن كل ما يخطر ببالي من أفكار متعلقة بالحياة الاجتماعية والسياسية والثقافية.. سأكتب عن كل شيء أتمنى تغييره في واقعنا العربي

السبت، فبراير 04، 2012

مريت بالشوارع..شوارع القدس العتيقة


هذه التدوينة ضمن "حملة لأجلك يا مدينة الصلاة ندون"


أنا اليوم ما راح أحكي كتير.. بس راح أفرجيكم صور جديدة من شوارع القدس العتيقة من زيارتين للقدس .. زيارتين كانوا فعلاً بوقتهم.. كنت أمشي بالشوارع نفسها كل يوم بس كل مرة كنت أشوفها مختلفة.. كل مرة أحس إني بكتشفها مرة تانية.. مش عارفة أوصفلكم كيف كان شعوري .. ابتسامة مع دمعة مع خوف من عدم رؤيتها مرة تانية بحياتي مع شوق ما بينتهي ولا مرة..
اليوم راح تشوفوا القدس بكل شي اكتشفته فيها وما تقلقوا رح احكيلكم عن الأماكن مشان تتعرفوا عليها :)
ملاحظة مهمة كتير.. إنه الصور كلها من تصويري :)


في بالقدس نوعين من الأبواب، أبواب خارجية بتحيط بالبلدة القديمة وأبواب داخلية بتحيط بمنطقة الحرم. منطقة الحرم فيها مسجد قبة الصخرة والمسجد الأقصى والمسجد المرواني اللي راح تشوفوهم هلأ


راح نبدأ من باب العمود


وبعد ما ندخل من باب العمود بنمشي بالسوق وأكيد إزا اتطلعتوا على الجانبين راح تلاقوا حارات قديمة كل وحدة إلها اسم مثل "عقبة أشتون" و "طريق الآلام"



في الشوارع القديمة للقدس بنشوف مطاعم وفي محلات وفي أوتيلات كمان. هون مثلاً مطعم اسمه "البلدة القديمة" بس بصراحة ما جربته أنا :$

وأهم شي مطعم أبو شكري. بيعمل حمص وفلافل غير شكل

وهاي محل من محلات الخزفيات اللي بتتميز فيها المدن الفلسطينية اللي فيها حركة سياحة مثل بيت لحم والناصرة. هاد المحل في القدس :)

إذا دخلنا من باب الناظر أو باب حطة راح نوصل لساحة الحرم اللي في هاي الصورة



وطبعاً وين ما تكونوا بالقدس راح تشوفوا القبة الذهبية اللي بتشع صيف وشتا. إليكم مسجد قبة الصخرة

ومسجد قبة الصخرة من الداخل ... داخل المسجد في مكان في الوسط بتحط إيدك بتصير ريحتها مسك.. هاد مكان موطئ قدم سيدنا محمد على الصخرة المشرفة (للأسف ما صورته بس بوعدكم إذا ربنا أكرمني بزيارة تانية راح أصوره)

وهاد الدرج اللي بننزل فيه تحت الصخرة المشرفة اللي وقف عليها سيدنا محمد عليه الصلاة والسلام لما عرج إلى السماء


وهون أسفل الصخرة المشرفة. وللعلم الصخرة ليست مرتفعة عن الأرض


وجنب مسجد قبة الصخرة في المسجد الأقصى اللي أسري بسيدنا محمد إليه وفيه صلى بالأنبياء في ليلة الإسراء والمعراج. المسجد الأقصى قبته لونها أسود وفيه مكتبة

وهاد أحد أبواب المسجد الأقصى

وهاد الممر اللي قدام باب المسجد الأقصى

وهاي منظر عام للمسجد الأقصى من الداخل

وهاد منبر صلاح الدين اللي انحرق أكثر من مرة على مر التاريخ

وهاي قبة المسجد الأقصى من الداخل. كتير ناس بيفكروا إنها قبة الصخرة من الداخل وهاي معلومة غير صحيحة.

بعد المسجد الأقصى بنروح للمسجد المرواني. هاد المسجد تحت الأرض وبيتميز بالمصاطب الكتيرة والحجر المقدسي القديم وهو مسجد كبير فعلاً لكن ما في اهتمام منيح فيه. اللي سمعناه اللي الشيخ رائد صلاح ساهم بشكل كبير بإعادة تأهيل المسجد وفرشه متل ما موجود بالصورة التالية

وهلأ بدنا نطلع من الحرم من جهة باب السلسلة وهاد اللي بتشوفوه




أي باب من أبواب الحرم بنطلع منه بيكون في سوق بيبيعوا فيه اكسسوارات وصناعات يدوية غالبيتها مصنوعة بالقدس ومكتوب عليها "صنع في القدس"
ومن باب السلسلة بنقطع لـ خان الزيت. هالمرة كان في شب بيبيع سحلب وعصاير طبيعية وطبعاً في محلات كتير كمان بتبيع كل شي قديم وجديد

وما بيصير أوصل القدس بدون ما أزور كنيسة القيامة. الصورة هاي لمدخل الكنيسة


وهاي الكنيسة من جوه. وهي عبارة عن طابقين بالإضافة إلى طابق تحت الأرض فيه لوحات فسيفساء.

راح تشوفوا الحجاج المسيحيين وهم بيمشوا في شوارع البلدة القديمة وهم طالعين أو داخلين لكنيسة القيامة.




بيقابل كنيسة القيامة مسجد عمر بن الخطاب وهو مسجد جميل جداً أيضاً وما أجمل عندما يسمع صوت الأذان ويدق جرس الكنيسة بنفس الوقت.


لو دخلنا من شارع المارستان الصلاحي بنوصل مباشرة للكنيسة اللوثرية. وهي بالزبط مقابل مدخل كنيسة القيامة الصغير.

في الكنيسة في برج بنطلعله بـ 180 درجة. لما توصل للقمة بتشوف مدينة القدس من كل الجهات. بعد كل عدد معين من الدرجات في مكان استراحة.
هاي الجهة الأولى بنشوف منها منطقة الحرم كاملة



الجهة التانية بنشوف منها الحي المسيحي بكنايسه

الجهة التالتة من مدينة القدس 

وأخيراً منظر القدس من الجهة الرابعة.


بعد ما نطلع من الكنيسة اللوثرية بنفوت بـ سوق أفتيموس.

في نهاية السوق في هالنافورة

بنلف اللفة وبنشوف المحلات اللي بتبيع النحاسيات والبسط والأشياء التراثية


 واحد من المحلات اللي بتبيع البسط والسجاد حاطط بكرج قهوة كبييييييير بالواجهة!

 وإحنا ماشيين لقينا هالمعلومة القيمة المحفورة على المعدن في حارة النصارى. المعلومة بتقول إنه حجارة هاد الشارع بتعود للعهد الروماني (القرنين الثالث والرابع الميلادي)

 وهاي هي الحجارة. بتقدروا تقارنوا الأحجار في الصورة اللي فوق واللي تعتبر حديثة والأحجار في الصورة اللي تحت اللي مش متناسقة وكبيرة كتير وألوانها مختلفة.

 وهاي اللافتة اللي بتقول إننا في حارة النصارى


 هلأ بدنا نطلع على جبل الزيتون. اللي بنقدر منه نشوف البلدة القديمة. منظر بيخطف الأنفاس فعلاً. الصورة من الأسفل فيها أضرحة. هاي مقبرة لليهود عملوها على جبل الزيتون ومطلة على منطقة الحرم لاعتقادهم أنه هاي النقطة هي أشرف نقطة 

وبعض البلدات التابعة لمدينة القدس متل بلدة سلوان كاملة.

هالمرة كان في بنت لابسة الثوب الفلسطيني وهالختيار قلها يابا ارفعي ايدك وقولي ياااااا رب. هاي الصورة كانت بعد ما صارت مشادة كلامية بين شب فلسطيني وواحد إسرائيلي على موضوع الأرض لمين.. راح أعمل بوست للفيديو في وقت لاحق




في هاي النقطة من العالم بيجتمعوا السياح ومشان هيك بنلاقي جمل وعقالات وبطاقات بريدية بتحمل صور من القدس. الأهم من هيك إنه السياح بيوصلوا لهاي المنطقة عشان يشوفوا القدس كاملة في أي وقت من أوقات السنة.

ويا رب الله يوعدكم جميعاً وتروحوا. إزا رحتوا لازم تعملوا اللفة فوق الأسوار. في جزئين، جزء بتشوفوا منه الحي الأرمني والحي اليهودي وهاد الجزء بياخد نص ساعة مشي فوق الأسوار. الجزء التاني بتشوفوا منه الحي الإسلامي والحي المسيحي وهاد الجزء الأكبر وبياخد تقريباً ساعة ونص مشي فوق الأسوار. أنا مشيت الجزء الأول لإنه كان يوم الجمعة والجزء الثاني بيكون مغلق عشان الزحمة.


راح أترككم في جولة حول الأسوار هلأ وبرجعلكم لما توصلوا لحائط البراق :)
















في نهاية الجزء الأول من السور بنوصل لـ باب المغاربة وبنشوف الجسر اللي مبني من جهة المسجد الأقصى متل ما شايفين في الصورة اللي تحت. وطبعاً في حراسة وممنوع ندخل لـ حائط البراق بس بنقدر نشوفه من بعيد وإحنا طالعين على البلدة القديمة.

في أكتر من طريق لحائط البراق وراح تشوفوا اللافتات اللي مكتوب عليها "حائط المبكى"


منظر الحارة اللي محطوط فيها اللافتة..

وهون صورة لـ مسجد ومقام السيوفي.. بس ما عندي معلومات عنه للأسف :$

وكيف الواحد يروح عالقدس من غير ما يمشي في شارع صلاح الدين؟ هاد الشارع مقايل لـ باب الساهرة بالزبط

وغزة كانت حاضرة في شوارع القدس العتيقة!!..


والختام لمسجد قبة الصخرة من أمام باب حطة (اللي عنده المتوضأ)





هناك 9 تعليقات:

  1. الله بجد
    موضوع مميز كالعاده يا راما
    حسيت اني بتمشي في القدس :D
    ربنا يعيد الحق لاصحابـه
    مميزه كالعاده :)

    ردحذف
  2. عبد الرحمن شكرا كتير لتعليقك. يسعدني انه وصلت هاد الإحساس وبتمنى من كل قلبي انه يتمكن كل انسان من زيارة هالمدينة الساحرة

    ردحذف
  3. حسين اليحيصي17 أكتوبر 2012 في 5:04 ص

    موضوع رائع جدا اخت راما ,,, ان شاء الله النصر والتحرير المدينه عما قريب بعون من الله ,,,, كل فلسطيني يتمنى ان يزور المدينه المقدسه ,,, تقبلي مروري وفائق احترامي

    ردحذف
    الردود
    1. يسعدني مرورك أخ حسين وسعيدة بأن الموضوع أعجبك وأتمنى فعلا لكل فلسطيني زيارة هذه المدينة الرائعة

      حذف
  4. ما دعاني لكتابة هذا التعليق هو تصحيح بعض المعلومات الواردة هنا:
    - ليس في مدينة القدس حرم، فالحرم مصطلح شرعي يدل على تحريم أمور معينة داخل الحرم كالصيد وقطع الأشجار.
    - المسجد الأقصى هو كل المنطقة داخل السور (التي تسمينها الحرم). مساحته ١٤٤ دونما، وبه مصليات عديدة مثل:
    * الجامع القبلي: وهو المصلى الجنوبي ويتسع لقرابة ٥٠٠٠ مصل.
    * مصلى قبة الصخرة: تصلي النساء فيه عادة أيام الجمعة، وهو في المستوى العلوي.
    *المصلى المرواني: وهو جزء من التسوية التي عملها الأمويون لرفع البناء الذي بني عليه الجامع القبلي.
    *مصلى البراق: وهو في نفس مستوى المصلى المرواني، ويقع في الجهة الغربية.
    *مصلى الأقصى القديم: وهو الاسم الذي يطلق على التسوية الموجودة تحت الجامع القبلي.
    كما توجد بالمسجد الأقصى قباب ومآذن وأبار وأشجار ومساطب وأسبلة.

    وشكرا.

    ردحذف
    الردود
    1. غير معرف شكراً جزيلاً لمرورك وللمعلومات القيمة التي ذكرتها هنا. وأشكرك لمتابعة صفحتي أيضاً

      حذف
  5. لمعلومات أخرى :
    http://www.palqa.com/index.php?module=aqsa

    ردحذف
    الردود
    1. شكرا جزيلاً على المعلومات القيمة في الرابط أعلاه

      حذف
  6. واو .. انا لا اعرف القدس جيدا لكنها اعجبتني ..
    لكن لمادا يسكنها المسيحيون ؟

    ردحذف