ثورة من الذات: توقيتين ...لشعب واحد
هنا سأكتب عن كل ما يخطر ببالي من أفكار متعلقة بالحياة الاجتماعية والسياسية والثقافية.. سأكتب عن كل شيء أتمنى تغييره في واقعنا العربي

الثلاثاء، أغسطس 30، 2011

توقيتين ...لشعب واحد



قبل عدة أيام من نهاية شهر رمضان انتشر خبر على مواقع الانترنت وبين الناس بأن التوقيت سيتغير أول أيام العيد ليعود للتوقيت الصيفي.
المفاجأة كانت أنه قبل العيد ب 3 أيام نزل الخبر على وكالة معاً الإخبارية يقول "مع مراعاة فارق التوقيت بين الضفة وغزة !؟"
وصار اللي كنا بتمنى انه ما يصير.. في ليلة 29 أغسطس/رمضان 2011 تم تعديل الساعة في الضفة بينما قررت الحكومة في غزة أنه يبقى التوقيت في غزة توقيت شتوي
ليصبح فرق التوقيت بين الضفة الغربية وقطاع غزة ولأول مرة بالتاريخ ساعة كاملة (60 دقيقة)
لأول مرة بحياتي بحس انه الضفة الغربية صارت كإنها دولة تانية
لأول مرة بحكي مع اصدقائي كإنهم مسافرين بقلهم قديش الساعة عندكو؟!
اه.. صار بينا ساعة ومستغربة كتير من الناس اللي مستسهلين الموضوع.. اللي يقول "هي وقفت عالساعة؟" واللي يقول "بسيطة"
أنا مش شايفة انها بسيطة... اليوم انقسمنا بالتوقيت بكرة بيجي العيد بالضفة قبل أو يمكن بعد العيد بغزة وبعدها بيصير يوم الاستقلال للضفة غير يوم الاستقلال لغزة.. والحبل عالجرار
وبعدين بتنضم غزة لمصر (توقيتهم واحد وكان في فكرة استبدال العملة المتداولة "الشيكل" بالجنيه المصري) وبتنضم الضفة للأردن (كمان توقيتهم واحد وتقريبا مفتوحين على بعض)
بس مشان يحسسونا إنه إلنا دولة رح تضل حكومة بغزة وحكومة بالضفة.. شو رأيكم بهالمشروع الظريف؟
انا ما عم ببالغ... هاد الواقع اللي وصلناله
رح نعلي صوتنا هالمرة ونعترض ولا كمان مرة رح نسكت ويستمر المسلسل؟
هالمرة هتافنا رح يكون "وقت واحد لا وقتين" بدل "شعب واحد لا شعبين"!!!

هناك 8 تعليقات:

  1. والله صحيح يا راما .. عن جد شيء بيعقد ومن فصيلة المبكي المضحك ..مش عارفين على شو اتفقوا علشان يختلفوا .. فاكرة ايام التوجيهي ، كانوا كل واحد يعلن النتيجة ع هواه .. وبكرة يمكن يصير العيد عيدين والعملة عملتين طالما انه الحكومة حكومتين والبلد بلدين ..

    """
    عموما كل عام وانت بخير يا راما

    ينعاد عليك وعلى الأسرة الكريمة بالخير والبركة ان شاء الله ..

    ردحذف
  2. عزيزتي وجع البنفسج
    اولا كل عام وانت بألف خير وشكرا إلك
    ثانيا بشكرك على تعليقك معك حق صارت اخبارنا مضحكة مبكية ومش راح اقولك ان شاء الله ما بنوصل للمرحلة اللي بتحكي عنها لإنه احنا فعلا وصلنالها لكن أملنا بربنا كبير انه يعطينا القوة والعزم لنغير هالواقع حتى لو ما كان في وسيلة غير الكلمة الصادقة
    اخيرا شكرا لمرورك وبتمنى تكوني زائر دائم بهالمحطة

    ردحذف
  3. الموضوع بستاهل كتير , الله يصبرنا يارب

    ردحذف
  4. Rasha Skaik
    شكرا لمرورك
    وفعلا الله يصبرنا بس تقريبا ماضل اشي نصبر عليه!!

    ردحذف
  5. ما ضل هتافة بالدنيا ما هتفناها ,, إمتى راح نبطل نهتف ؟!!!!!1

    ردحذف
  6. فوبيا

    شكرا لاهتمامك وتعليقك على التدوينة

    بالنسبة للهتاف بتخيل انه على مر التاريخ صار اشارة بيفمهمهااي انسان بالعالم انك بتعبر عن اشي جواك مقتنع فيه انه صح وانه لازم يصير
    وبوضعنا الفلسطيني ما بتصورانه رح نبطل نهتف الا لما نحقق كل اللي بدنا اياه طبعا بجانب الخطوات التانية

    بتمنى تكون زائر دائم في محطتي المتواضعة

    ردحذف
  7. أكتر شي مش قابل ينهضم معي قصة الأزهر و الإسلامية !
    كيف يعني 10 خطوات بيقلبوا الزمن ؟؟
    الله يهدينا و يهدي ولاة الامر !!

    ردحذف
  8. مزبوط هديل. انه يكونوا جامعتين الفاصل بينهم حيطة ويتعاملوا بتوقيت فرق ساعة بينهم اشي ما بيحمله العقل!!
    شكرا لمرورك على صفحتي وبتمنى تزوريني دايما

    ردحذف