موضوع الانقسام صار موضوع الشارع الفلسطيني خاصة بعد الثورات في مصر وتونس. وتجمع الشباب الفلسطيني حول فكرة إنهاء الانقسام. طبعاً يا شباب يعطيكم العافية إنه أخدتوا زمام المبادرة وعنجد بديتوا تشتغلوا مش بس بالحكي، لأ كمان بتنظيم فعاليات كتيرة بعضها نجح وبعضها الآخر للأسف ما لاقى نفس النجاح لأسباب مختلفة ما بدي أخوض فيها هلأ لإنه في غيري بيحكي عنها ومش موضوعي أصلاً الحركة الشبابية.
أنا ما رح أحكي عن الانقسام من ناحية سياسية بس من ناحية حياتنا اليومية. كيف بدأ الانقسام الفلسطيني؟ سؤال سألته لإلكم وأعطيتوني آراء كتيرة في منكم قال انه لما راح الدين راح الوطن. ناس قاله السبب هو الكرسي وناس قالوا لإنه الانقسام بدأ لما نشأ التجمع الإسلامي وبنيت الجامعة الإسلامية. بحترم رأي كل واحد شارك في الإجابة على هالسؤال بس خليني أسلط الضوء على الحكي اللي ما انحكى.
برأيي الانقسام بدأ لما بدينا نحكي انا من غزة أو انا من الضفة بدل ما نحكي أنا من فلسطين
بدأ الانقسام لما صرنا نقول هاد لاجئ وهداك مواطن
ولما صرنا ندعو للمسيرات باسم الأحزاب مش باسم فلسطين
ولما نشارك بالمسيرات اللي بترفع الأعلام الحزبية بدل علم فلسطين ونهتف للتنظيمات
بدأ الانقسام لما صرنا نحط أعلام التنظيمات على جثث الشهداء بدل ما نحط علمنا الفلسطيني
ولما نحكي عن الشهداء أو المعتقلين ونقول الشهيد القسامي أو الفتحاوي ونقول هاد معتقل ضفاوي أو غزاوي أو من حركة الجهاد الإسلامي أو الجبهة الشعبية بدل ما نقول الشهيد الفلسطيني والمعتقل الفلسطيني
بدأ الانقسام لما صار الشعب يستجيب لنداءات الأحزاب ولما تناديه فلسطين ما يستجيب
أول خطوة فعلية لإنهاء الانقسام هي قتله في حياتنا اليومية من خلال الكلمات اللي بنستخدمها
اول اشي مبروووك يا راما على المدونة :))
ردحذفتاني اشي .. فعلا موضوع الانقسام هو مبدأ موجود من بداية التاريخ .. مبدأ "فرّق تسد"
وقد ما بنعرف انو الانقسام اشي سئ ومافيه مصلحة إلا للاحتلال .. الا انو بنضل نوقع فيه واحنا مش منتبهين
يمكن لازمنا ثورة حقيقية على كل هادي الظواهر السلبية زي ما حكيتي .. قبل ما نروح ونطالب بانهاء الانقسام السياسي
تحياتي
مبروك المدونة ، راما ، الزيارة الأولى و لن تكون الأخيرة ، مبروك مرة تانية ، و أهلا فيكي في عالم اللاحدود ،
ردحذفثائر شكرا لمرورك وبيسعدني قراءتك لمدونتي
ردحذفحلووووو موووووضعك
ردحذفوانتي راااائعة الى الامام